1967 թվականին նորաստեղծ թանգարանի տնօրեն է նշանակվում արվեստաբան Շահեն Խաչատրյանը: Նա աշխատեց տուն-թանգարանում մինչև 2003 թվականը: Իր հարուստ թանգարանային գործունեության ընթացքում ՝շուրջ չորս տասնամյակ, արվեստաբանը դրսևորվել է որպես թանգարանների, հարյուրավոր անհատական ցուցահանդեսների կազմակերպիչ՝ խորհրդային երկրներում, արտասահմանյան բազում քաղաքներում:

Հեղինակ է հայ մեծ նկարիչներին նվիրված բազմաթիվ ալբոմների, գրքերի, կատալոգների, այդ թվում «19-20-րդ դարերի հայկական արվեստ», «Ֆրանսահայ կերպարվեստ», «Հովհաննես Այվազովսկի», «Սարյան», «Մինաս», «Հակոբ Հակոբյան», «Ցավի գույնը» ծավալուն պատկերագրքերը:

Մշակույթի ազնիվ ծառայողը խոշոր ներդրում ունի թանգարանային ֆոնդերի համալրման և հանրահռչակման գործում: Շնորհիվ նրա Հայաստանի թանգարանների ֆոնդերը համալրվել են արվեստի հարյուրավոր գործերով:

Շահեն Խաչատրյանը ՀՀ արվեստի վաստակավոր  գործիչ է 1972 թվականից, 1991–ից մինչև 2002 թվականը եղել է ՀԱՊ-ի տնօրեն:  1997-ին արժանացել է  ՀՀ «Մովսես Խորենացի» մեդալի: 2004 թ-ից աշխատում է էջմիածնի Մայր տաճարում՝ որպես մշակութային խորհրդական և «Խրիմյան Հայրիկ» թանգարանի տնօրեն: